Fylkesbiblioteket i Hordaland har fått tildelt 800 000 kr frå Nasjonalbiblioteket for å laga 206 arrangement på 206 ulike stader i 32 kommunar i fylket, i samband med Bokåret 2019. Dette fortel Hordaland Fylkeskommune på nettsidene sine.
I år er det 500 år sidan den første norske boka blei trykt. For å feira denne historisk viktige hendinga har Nasjonalbiblioteket tatt initiativet til ei stor nasjonal markering, nemleg Bokåret 2019, som skal markerast i heile landet med 1500 arrangement i 500 bibliotek.
Alle folkebiblioteka i Hordaland skal vera med på å markera Bokåret 2019. I tillegg til dei stasjonære biblioteka, vil bokbåten Epos og dei fire kommunale bokbussane ha med seg gode arrangement til kvar kring og krok i fylket. Bergen kommune har òg fått 800 000 kroner for markeringa i Bergen.
Oppdaga nye favorittar
Målet med Bokåret 2019 er å spreia leseglede og interesse for litteratur til publikum i alle aldrar.
– Det kjem til å bli stor variasjon i arrangementa vi tilbyr til både born, ungdom og vaksne. Målet er at alle skal kunna finna eit arrangement som interesserer dei. I Bokåret 2019 sender vi ut mange av dei mest kjende og populære forfattarane i landet til biblioteka i Hordaland slik at publikum kan få møta favorittforfattarane sine på sitt lokale biblioteket. I Bokåret 2019 skal ein bli endå betre kjent med litteraturen ein allereie er glad i og oppdaga nye litterære favorittar, seier Ruth Ørnholt, fylkesbibliotesjef i Hordaland.
Program kjem etter kvart
Programmet for Bokåret 2019 er under planlegging. Nettstadane til fylkesbiblioteket på hordaland.no og til dei dei lokale biblioteka vil kontinuerleg bli oppdaterte med litteraturarrangementa som kjem i løpet av året.
Illustrasjonsbilete: Arkiv
