Hordaland fylkeskommune har valt ut dei første programkommunane i tilskotsordninga til Program for folkehelsearbeid. Dei involverte kommunane utgjer omtrent 75 prosent av befolkninga i Hordaland.
Dei såkalla programkommunane får midler til utvikling av tiltak over fleire år.
– Det er flott å sjå at kommunar som utgjer så stor del av befolkninga, og er geografisk spreidd i fylket, ynskjer å vera programkommune, seier Mette Nora Sætre, næringssjef i Hordaland fylkeskommune.
Langsiktig arbeid
Hordaland fylkeskommune vart i vår tildelt 36 millionar over seks år frå Helsedirektoratet gjennom den nasjonale satsinga «Program for folkehelsearbeid». Middela går til arbeid som skal betre psykisk helse hos barn og unge.
I mai lyste fylkeskommunen ut midlar. Kommunane som no blir programkommunar har alle skissert utkast til tiltak dei ønskjer å utvikle. Dei får no høve til å arbeide med prosjekta i tre til fire år. Til saman er det seks prosjekt som får midler.
Kommunane som startar sitt prosjektarbeid er Askøy, Bømlo, Bergen, Kvinnherad og Stord. I tillegg søkte Hardangerkommunane og Voss om eit større samarbeidsprosjekt. Dei er òg teke opp i tilskotsordninga. Kvam herad skal samordna dette arbeidet.
Hordaland fylkeskommune er programansvarleg og samordnar programarbeidet regionalt. Fylkeskommunen har det overordna ansvaret for å driva arbeidet framover, og har det økonomiske og administrative ansvaret.
– Me ser fram til det vidare arbeidet med utvikling av gode tiltak for barn og unge i Hordaland, seier Sætre.
Skal oppleva tilhøyrigheit
Dei fleste ungdomar i Hordaland er både friske og aktive, har fleire vener og trivst godt i sitt nærmiljø. Det er likevel rom for forbetringar. Fleire av prosjekta handlar om å finne modellar som kan auka barn og unge si involvering i lokalsamfunnet.
Tiltaka siktar seg inn mot barn og unge frå tre til 24 år. Barnehage, grunnskule, vidaregåande skule, arbeidsliv og nærmiljø er viktige arenaar kommunane vil arbeide med. Ein viktig verdi i arbeidet er at målgruppa får oppleva ei tilhøyrigheit i sitt lokalsamfunn og at det er låg terskel for å delta sosialt.
Dei seks prosjekta som no startar, er valt ut etter råd frå det regionale samarbeidsorganet for folkehelsearbeidet i Hordaland. Dette er eit fagnettverk som skal vera med å styrke utviklinga av tiltak ute i kommunane.
Fakta
- Program for folkehelsearbeid er ei nasjonal satsing for å styrka psykisk helse og rusførebyggande arbeid i folkehelsearbeidet.
- Satsinga skal bidra til å auka kompetanse i kommunane på tiltaksutvikling for barn og unge, og fremja kompetanseutvikling og samarbeid.
- Hordaland blei programfylke i mars i år. Prosjektperioden er frå 2018 – 2023.
