Meny Lukk

Med eigne ord

For nokre år sidan fekk Eirin Spilde ei utfordring av musikaren Gunnar Bjelland. Han hadde skrive ein melodi meint for ho, men ho fekk den berre dersom ho skreiv teksten sjølv – ein jobb Spilde trudde at ho aldri ville få til

eirin spilde
I samtale med programsekretær JK Flattun fortel ho at ho grubla mykje på denne utfordringa og at ho fleire gonger prøvde å overtala Bjelland til å skriva teksten. Men han heldt fast på sitt .

– Og plutseleg losna det, ei natt faktisk, då eg sat og lytta til melodien. Dette er tre år sidan og då hadde eg ei litt tung tid i Odda, sat inne med mykje kjensler og såre erfaringar, og i ein ein slik situasjon får ein gjerne behov for å setja ord på ting, seier Spilde.

Ho fortel at det kom ein heil song med fire vers og refreng der og då. – Og då måtte eg ta det ned på papiret, ellers hadde eg ikkje hugsa noko av teksten etterpå.

Då dette var gjort, ringte ho Bjelland – midt på natta og fortalde at ho hadde gjort det han bad om. Ville han lesa det?

Det ville han, og responsen Spilde fekk frå den kanten var oppløftande. Eg visste det. Fantastisk, sa han ifylgje Spilde. – Og der byrja det faktisk for meg når det gjeld å skriva tekstar, seier ho.

No ligg det føre ei diktsamling på 300 dikt frå Eirin Spilde si hand, fleire av dei tidlegare publisert på Facebook. Somme har oppmoda ho om å samla tekstane i ei bok, noko ho no har gjort i samarbeid med fotograf og designer Tor Kaspersen som ho vart kjend med då ho heldt konsert i Haugesund for halvanna år sidan.

– Me er vener på Facebook, der las han dikta mine og sende meg eitt som han hadde illustrert, som eg syntes var veldig bra gjort. Det er han som har vore pådrivar i dette bokprosjektet, og realisering av sjølve boka byrja eigentleg der, fortel Spilde, og legg til at det og har kome ein førespurnad frå Tyskland  og, og at boka skal vera ferdig for sal der til våren.

Når et gjeld innhaldet i dikta, skriv ikkje Spilde i eg – form. – Det er jo mi historie så klart, men eg trur eg skriv slik at mange kjenner seg att i det dei les. Det får eg og tilbakemeldingar på frå fleire, og eg er svært glad for at mange gir uttrykk for at dei likar det eg gjer.
Dersom eg kan røra nokre hjarte, synes eg det er fantastisk, seier ho.

Boka heiter «Ord som varmer».

Ifylgje Spilde var det forfattaren Lars Ove Seljestad som anbefalte at dikta vart utgjevne på eige forlag, noko Tor Kaspersen har teke seg av. Han er og mannen bak alle illustrasjonane i boka.

Boka kjem saman med ein kalender for 2018 og ein CD med bakgrunnsmusikk.

Den ferske forfattaren er for dei fleste mest kjend som songar, og samarbeidet hennar med den britiske bluesmusikaren Norman Beaker, har vore omtalt på Radio Folgefonn tidlegare.  Det kan du lesa om her: Blåtonar.

I desse dagar har Eirin Spilde vore innom studioet «Lyd i løo» i Norheimsund, der ho har spelt inn to av dei låtane som Norman Beaker har skrive til ho.

– Det er Norman Beaker Band som står for musikken, det er spelt inn i England og sendt til platestudioet. Eg er berre med på vokal, så det er jo fantastisk, seier Spilde.

Om det kjem større oppdrag for artisten Eirin Spilde etter samarbeidet med Norman Beaker, har ho eit realistisk syn på. – Eg har vore så heldig å dette låtmaterialet av ein så anerkjend musikar/komponist som Norman Beaker, og då må eg jo gjera noko med det. Kva som kjem etterpå får me sjå, men skulle det verta suksess, er jo det ein god bonus å ta med seg.

Legg inn en kommentar

Dette nettstedet bruker Akismet for å redusere spam. Lær om hvordan dine kommentar-data prosesseres.

%d bloggere liker dette: