Meny Lukk

Godt driftsresultat for fylkeskommunen

Rekneskapen for Hordaland fylkeskommune for 2017 viser overskot på 107 mill. kr. Stram økonomistyring er hovudårsaka til det positive resultatet skriv fylkeskommunen på nettsidene sine

fylkesvåpen

Skatteinngangen i 2017 er 16 mill. kr høgare enn budsjettert. I 2016 stod skatteinngangen for nær 100 mill. kr av resultatet. – Drifta vår er no vesentleg betre, slik at det ikkje er utanforliggjande årsaker til det gode resultatet, men solid innsats frå medarbeidarane i heile fylkeskommunen. Dette er ei gledeleg utvikling, understrekar fylkesrådmann Rune Haugsdal.

Opplæringssektoren har i 2017 eit positivt budsjettavvik på 16 mill. kr. Det har dei siste åra vore stort fokus på den økonomiske utviklinga i sektoren, og det gode arbeidet viser no att i resultatet for 2017. Samferdselssektoren viser også overskot i rekneskapen med pluss 17 mill. kr. Desse to sektorane står for om lag 80 prosent av fylkeskommunen si drift.

Framleis krevjande økonomisk situasjon

Trass i det positive rekneskapsresultatet, har fylkeskommunen ein krevjande økonomisk situasjon. Høg lånegjeld og auka kostnader med nye, miljøvenlege ferjekontraktar medfører sterk auke i både drifts- og investeringskostnadene. Inntektsveksten fylkeskommunen kan rekne med i åra framover, vil langt frå vere tilstrekkeleg til å makte kostnaden med klimaløftet.

– Vi arbeider målretta for å levere gode og solide tenester til innbyggjarane i Hordaland innanfor alle våre ansvarsområde, og det er eg trygg på at vi skal klare også i åra framover. Knappe økonomiske rammer gjer likevel at vi må prioritere endå tydelegare, seier Rune Haugsdal.

Mange tidlegare tunge investeringar

Fylkeskommunen har gjennom mange år investert tungt i nye og framtidsretta skulebygg, tannklinikkar og infrastruktur. Det har resultert i ei lånegjeld på 10,6 mrd. kr ved utgangen av 2017 med ein gjeldsgrad – gjeld i prosent av driftsinntekter – på 113,4 prosent. Fylkestinget har vedteke at gjeldsgraden ikkje skal overstige 115 prosent, så fylkesrådmannen viser til at ein i rekneskapen for 2017 ligg tett opp under denne grensa. Dette vil påverke handlefridomen i åra som kjem.

Totale driftsutgifter var i 2017 8 014 mill. kr, og til renter og avdrag på lån vart det brukt 716 mill. kr. Investeringane i 2017 var på 2,5 mrd. kr.

Opplæring og samferdsel størst

Det største tenesteområdet er opplæring med driftskostnader på 3 150 mill. kr i 2017. Samferdselssektoren følgjer hakk i hel med kostnader på 3 126 mill. kr.

– Eg vil gje honnør til alle einingane og medarbeidarane for dette flotte resultatet. Det har dei siste åra vore arbeidd systematisk med å snu den negative driftsutviklinga og resultatet for 2017 viser at ein er på god veg, seier fylkesordførar Anne Gine Hestetun.

Legg inn en kommentar

Dette nettstedet bruker Akismet for å redusere spam. Lær om hvordan dine kommentar-data prosesseres.

%d bloggere liker dette: